tyad fi sih di yout dem a bun some weed fi yuh

trying desperately fi numb di pain weh dem feel fi yuh

mek dis year bi di change wih long fi sih innah yuh

strut bout town wid yuh books dem close tuh yuh

mek yuh weekend hang out bi wid family who care fi yuh

walk off from a bwoi who yuh tink a dis yuh

nuh mek wan nedda bredda or sitah miss yuh

just beg yuh memba seh wih as a community love and care fi yuh

mourn fi yuh

have board meeting ovah yuh

beg tom dick and harry fi tek time out a dem schedule and volunteer dem time fi yuh

beg pawsin deacon and prayah warriors fi storm hebbin fi yuh

duh black bwoi just beg yuh membah seh wih care fi yuh

and wih sick an tyad fi trow brown dirt ovah yuh

scattering pedals ovah yuh

holding up yuh pregnant baby moda fi yuh

opening up truss fund fi yuh toddlah fi yuh

praying seh yuh bwoi dem won’t retaliate fi yuh

black bwoi what else can wih really duh fi break di cycle fi yuh

wih long fi change society fear fi yuh

open up yuh mout and chat tuh wih suh wih wih hear yuh

and bettah know how fi support yuh

cause as bad as tings was in the past fi yuh

di future hold great promise fi yuh

suh beg yuh just hold a seat and pene di message wih a try fi send tuh yuh

black bwoi wih love and care fi yuh

NAW (c) Jan. 2011